British Council elm, texnologiya, mühəndislik və riyaziyyat (STEM) sahələrində qlobal gender bərabərsizliyinin azaldılması məqsədilə təsis edilmiş “Women in STEM” Təqaüd Proqramı üzrə 2026/2027-ci tədris ili üçün müraciətlərin qəbuluna başladığını elan edir.
Qadınlar tədqiqat və innovasiyaya mühüm töhfələr versələr də, dünya üzrə STEM sahələrində hələ də yetərincə təmsil olunmurlar. Bu təqaüd proqramı ali təhsilə çıxışı genişləndirməklə və qadınların STEM sahələrində liderliyini gücləndirməklə bu vəziyyətin dəyişdirilməsini hədəfləyir.
Təqaüd haqqında
Proqram sosial baxımdan həssas və ya az təmsil olunan qruplardan olan qadınlara Böyük Britaniyanın aparıcı universitetlərində tam maliyyələşdirilən, birillik magistratura təhsili almaq imkanı yaradır.
Artıq 6-cı ildir həyata keçirilən bu təşəbbüs çərçivəsində 43 Böyük Britaniya universiteti ilə əməkdaşlıq edilmiş və dünya üzrə təxminən 500 qadın təqaüdçü dəstəklənmişdir.
Təqaüd çərçivəsində təmin olunur:
- Tam maliyyələşmə – təhsil haqqı, yaşayış xərcləri üçün aylıq stipendiya, yol və viza xərcləri, tibbi sığorta, eləcə də ingilis dili dəstəyi daxil olmaqla; hər bir təqaüdün ümumi dəyəri minimum 40,000 funt sterlinqdir
- Dünya səviyyəli universitetlərdə təhsil – Böyük Britaniya elm və tədqiqat sahəsində qlobal miqyasda tanınır və bu sahədə dünyada 2-ci yerdə qərarlaşıb
- Karyera imkanları – proqram iştirakçıların STEM sahəsində karyera inkişafına töhfə verir və əldə etdikləri bilik və təcrübəni öz ölkələrində innovasiya və tədqiqatın inkişafına yönəltmələrinə şərait yaradır
- Məzun şəbəkələri – Böyük Britaniya məzunları ilə uzunmüddətli əlaqələrin qurulması imkanı təqdim olunur
Təsir və imkanlar
Təqaüdçülər qabaqcıl tədqiqat mühitində təcrübə qazanır və liderlik bacarıqlarını inkişaf etdirirlər. Proqramın məzunları adətən:
- Öz ölkələrində STEM təşəbbüslərinə rəhbərlik edir
- Elmi tədqiqat və innovasiyanın inkişafına töhfə verir
- STEM sahəsində gələcək nəsil qadınlara mentorluq edir və onları ruhlandırır
- Qlobal və regional STEM ekosistemlərinin gücləndirilməsində iştirak edirlər
2026–2027 müraciət dövrü
- 30 uyğun ölkə və ərazi üzrə qadın namizədlər üçün açıqdır
- STEM sahələri üzrə seçilmiş birillik magistr proqramlarını əhatə edir
- Namizədlər müraciət etməzdən əvvəl rəsmi səhifədə uyğunluq meyarları ilə tanış olmalıdırlar
Proqram akademik mükəmməllik, liderlik potensialı və öz icmalarında STEM sahəsinin inkişafına töhfə vermək öhdəliyi nümayiş etdirən qadınlara üstünlük verir.
