Karyeranı formalaşdıran təcrübə imkanı
ARDNF gənc kadrların inkişafına xüsusi önəm verir və onların peşəkar mühitdə formalaşması üçün məqsədyönlü imkanlar yaradır. Fond ali təhsil müəssisələri ilə əməkdaşlıq edir, karyera sərgilərində iştirak edir və müxtəlif təcrübə proqramları həyata keçirir.
Bu çərçivədə ARDNF-də hər il Yay Təcrübə Proqramı təşkil olunur.
Proqramın məzmunu və üstünlükləri
Səkkiz həftəlik proqram çərçivəsində iştirakçılar Fondun fəaliyyət mexanizmi, struktur bölmələri və real layihələr üzrə iş prinsipləri ilə tanış olurlar. Onlar peşəkar əməkdaşlarla birbaşa işləyir, mentor dəstəyi alır və komanda mühitində praktiki təcrübə qazanırlar. Bu yanaşma iştirakçıların analitik düşüncə və peşəkar bacarıqlarının inkişafına xidmət edir.
Kimlər müraciət edə bilər
Bakalavr təhsil pilləsinin 3-cü və ya 4-cü kurs tələbələri, magistr tələbələri və son 1 ildə ali təhsilini başa vurmuş məzunlar müraciət edə bilərlər. Namizədlərdən Azərbaycan və ingilis dillərini yüksək səviyyədə bilmək, MS Office proqramları ilə işləmə bacarığı tələb olunur. Əlavə akademik və praktiki nailiyyətlər üstünlük kimi qiymətləndirilir.
Müraciət qaydası
Müraciətlər hər il aprel ayından etibarən açılır və yalnız onlayn sistem vasitəsilə qəbul olunur. Namizədlərə müraciət etməzdən əvvəl seçdikləri struktur bölmənin tələbləri ilə tanış olmaq və təqdim etdikləri məlumatların onların bilik və bacarıqlarını düzgün əks etdirməsinə diqqət yetirmək tövsiyə olunur.
Müraciət prosesi
Müraciət formasının doldurulması — Onlayn forma tam doldurulmalı və CV PDF formatında əlavə edilməlidir. Struktur bölmənin seçilməsi — Namizədlər maraq göstərdikləri struktur bölməni seçir və həmin bölmə üzrə tələblərlə tanış olurlar. Qiymətləndirmə mərhələsi — İlkin seçimdən keçən namizədlərlə əlaqə saxlanılır və onlar növbəti mərhələlərə dəvət olunur. Qiymətləndirmə mərhələsi may ayında təşkil olunur və fiziki iştirak tələb edir. Bütün namizədlər nəticə barədə məlumatlandırılır.
