Ali təhsilini xaricdə davam etdirmək istəyənlər üçün Erasmus Mundus Joint Masters (EMJM) dünyanın ən nüfuzlu beynəlxalq magistr proqramlarından biridir. Avropa İttifaqının Erasmus+ proqramı çərçivəsində həyata keçirilən bu təşəbbüs dünyanın müxtəlif ölkələrindən olan tələbələrə Avropanın aparıcı universitetlərində təhsil almaq və tam maliyyələşdirilən təqaüd qazanmaq imkanı yaradır.
Erasmus Mundus proqramlarının əsas məqsədi Avropa ali təhsilinin keyfiyyətini artırmaq, universitetlər arasında beynəlxalq əməkdaşlığı gücləndirmək və dünyanın müxtəlif ölkələrindən istedadlı tələbələri bir araya gətirməkdir.
Tələbələr proqram çərçivəsində fərqli ölkələrdə yaşayaraq beynəlxalq akademik mühitdə təcrübə qazanır, müxtəlif təhsil sistemləri ilə tanış olur və geniş peşəkar əlaqələr qurmaq imkanı əldə edirlər.
Tədris prosesi
Erasmus Mundus magistr proqramları adətən 1–2 il davam edir və 60, 90 və ya 120 ECTS kreditini əhatə edir. Tələbələr proqramın tələblərinə uyğun olaraq ən azı iki fərqli ölkədə təhsil alırlar.
Tədris prosesi proqramın istiqamətindən asılı olaraq mühazirələr, seminarlar, elmi-tədqiqat işləri, laboratoriya məşğələləri, istehsalat təcrübəsi (internship) və magistr dissertasiyasının hazırlanmasını əhatə edə bilər.
Proqramı uğurla başa vuran məzunlara birgə diplom (Joint Degree) və ya proqramda iştirak edən universitetlər tərəfindən verilən bir neçə diplom təqdim olunur.
Təqaüdün əhatə dairəsi
Erasmus Mundus proqramı üzrə ən yüksək nəticə göstərən namizədlərə tam maliyyələşdirilən təqaüd təqdim olun ur. Təqaüd aşağıdakı əsas xərcləri əhatə edir:
• Təhsil haqqı;
• Aylıq yaşayış xərcləri;
• Səyahət xərcləri;
• Tibbi sığorta;
• Digər zəruri xərclər üçün maliyyə dəstəyi.
Tam maliyyələşdirilən təqaüd sayəsində tələbələr təhsil xərcləri ilə bağlı əlavə yük olmadan magistr təhsillərini davam etdirə bilirlər.
Müraciət şərtləri
Erasmus Mundus proqramına dünyanın istənilən ölkəsinin vətəndaşları müraciət edə bilərlər. Namizədlər əsasən aşağıdakı tələblərə cavab verməlidirlər:
• Bakalavr dərəcəsinə malik olmaq və ya bakalavr təhsilinin son kursunda oxumaq;
• Magistr proqramı başlayana qədər ali təhsili başa vurmaq;
• Seçilmiş proqramın müəyyən etdiyi akademik və digər qəbul tələblərinə uyğun olmaq;
• Tələb olunan xarici dil biliyinə malik olmaq.
Bəzi magistr proqramlarında əlavə olaraq iş təcrübəsi, müəyyən sahə üzrə akademik hazırlıq və ya digər xüsusi meyarlar tələb oluna bilər.
Tələb olunan sənədlər
Erasmus Mundus proqramlarına müraciət zamanı tələb olunan sənədlər seçilən proqramdan asılı olaraq dəyişə bilər. Lakin adətən aşağıdakı sənədlər tələb olunur:
• Bakalavr diplomu və ya məzuniyyət haqqında arayış;
• Akademik transkript;
• CV (tərcümeyi-hal);
• Motivasiya məktubu;
• Tövsiyə məktubları;
• Xarici dil biliyini təsdiq edən sertifikat (məsələn, IELTS və ya TOEFL);
• Pasportun surəti;
• Proqram tərəfindən tələb olunan digər sənədlər.
Müraciət prosesi
Erasmus Mundus üçün vahid müraciət sistemi mövcud deyil. Namizədlər seçdikləri magistr proqramını həyata keçirən universitetlər qrupuna birbaşa müraciət edirlər.
Hər proqramın qəbul tarixləri, seçim meyarları və tələb olunan sənədləri fərqli olduğundan, müraciət etməzdən əvvəl seçilən proqramın rəsmi internet səhifəsində yerləşdirilən məlumatlarla tanış olmaq vacibdir.
Əksər Erasmus Mundus proqramları üzrə müraciət qəbulu növbəti tədris ili üçün adətən oktyabr–yanvar aylarında həyata keçirilir.
Təhsil istiqamətləri
Erasmus Mundus çərçivəsində müxtəlif sahələri əhatə edən yüzlərlə magistr proqramı mövcuddur. Bu istiqamətlərə aşağıdakılar daxildir:
• Kompüter elmləri və informasiya texnologiyaları;
• Mühəndislik;
• İqtisadiyyat və biznes;
• Biologiya və səhiyyə elmləri;
• Biotexnologiya;
• Ətraf mühit və davamlı inkişaf;
• Sosial elmlər;
• Digər akademik sahələr.
Proqramların axtarışı
Erasmus Mundus üzrə mövcud magistr proqramları rəsmi Erasmus Mundus Catalogue platformasında yerləşdirilir. Namizədlər burada proqramların istiqamətləri, iştirakçı universitetlər, qəbul şərtləri, müraciət tarixləri və digər vacib məlumatlarla tanış ola bilərlər.
Kataloq vasitəsilə maraq dairəsinə uyğun proqramları sahə, ölkə və universitet üzrə axtarmaq mümkündür.
Erasmus Mundusun üstünlükləri
Erasmus Mundus tələbələrə yalnız Avropada magistr təhsili almaq imkanı deyil, həm də beynəlxalq akademik və peşəkar təcrübə qazanmaq fürsəti yaradır.
Proqram iştirakçıları müxtəlif ölkələrin universitetlərində təhsil alır, fərqli mədəniyyətlərlə tanış olur, beynəlxalq əlaqələr qurur və gələcək karyeraları üçün mühüm bacarıqlar əldə edirlər. Erasmus Mundus məzunlarının əldə etdiyi beynəlxalq təcrübə onların əmək bazarında rəqabət qabiliyyətini artıran əsas üstünlüklərdən hesab olunur.
